Í tilefni af því að þessi litla og búlduleita snót skreið á fimmtugsaldurinn þ. 29. okt. s.l. þá verður slegið upp nettum dansleik í sal Sjálfsbjargar í Hátúni 12 laugardaginn 10 nóv.
Hin óviðjafnanlega Halla Gunnarsdóttir, blaðamaður, heimshornaflakkari, fótboltastelpa og sú kona sem fékk flest atkvæði í síðasta formannskjöri KSÍ verður veislustýra en hún ku eiga einstakt brandarasafn þar sem minna fer fyrir gæðum en magni. Stuðbandið Hraun ætlar að slá taktinn en sérstaklega skal bent á þá skemmtilegu hefð þeirra að hafa karókístundir svo allir geti látið ljós sitt skína og svalað athyglisþörfinni.

Gjafir, blóm og kransar eru vinsamlegast afþakkaðir en mér þætti mjög vænt um að þið létuð sjá ykkur og ekki verra að fá nettar lofræður eða hvers kyns aðrar uppákomur - innan velsæmismarka. Þeir sem vilja mega líka gjarnan láta eitthvað af hendi rakna til góðgerðarmála.

Partýið byrjar kl. 19 og stendur til miðnættis. Í boði verður fordrykkur og fiskisúpa en aðrar veigar verða seldar á barnum á vægu verði.

Hvers kyns viðhengi og vinir eru velkomnir og endilega látið þetta berast! Það þarf ekkert að láta mig vita, bara mæta!

Hlakka til að sjá ykkur!
Gunna Lára 39+

Jæja þá er kerla komin heim úr reisunni miklu til Búdapest og Rúmeníu. Svo ég byrji á Búdapest þá var ég mjög hrifin af borginni. Lenti þar á föstudagskvöldinu 14. sept með Ástu og Lindu landverjum með meiru sem hafa unnið með mér hérna í þjóðgarðinum
 
Við skelltum okkur á pöbbarölt og komumst að því að ungverskar konur sem eru ákaflega fallegar eru líka mjög drykkfelldar og klæða sig mjög glyðrulega á djamminu... manni leið bara eins og heima á Íslandi hmmm. Ungversku karlmennirnir voru ekki betri hvað varðar ölvunarástand, afar áreitnir en ekki að sama skapi huggulegir. Við brögðuðum að sjálfsögðu þjóðardrykkinn Unicum sem bragðast eins og blanda af gammeldansk og jagermeister. Alveg þolanlegt en það var góður kebabinn sem ég fékk mér fyrir háttinn úti á horni...
 
Morguninn eftir fengum við okkur feitan unverskan morgunverð á kaffi Önnu. Hann samanstendur af örpylsum, ommelettu, tómötum og söltuðu saltbeikoni. Mjög staðgott daginn eftir bjór og Unicum. Við röltum svo um göngugötuna, ég keypti mér appelsínugulan bol með risamaurum á og svo skelltum við okkur í rútuferð með gæd um bæinn sem var mjög gott til að fá smá tilfinningu fyrir borginni. Við skoðuðum svo eina Synagogu og skelltum okkur á útimarkað. Á leiðinni þangað sá ég þetta girnilega candyfloss... namminamm....

Það er mikið af skemmtilegum útimörkuðum í Búdó og á einum slíkum fann ég notaðan vasahníf (með korktappatogara) og kíki fyrir slikk sem komu sér hvort tveggja afskaplega vel síðar í ferðinni. Svo fórum við Linda í eitt af mörgum baðhúsum borgarinnar þar sem voru slatti af sundlaugum og alls kyns pottum og hægt að tefla og drekka bjór í lauginni (eitthvað sem stjórn skáksabandsins ætti kannski að athuga til að auka áhuga landans á skáklistinni). Við skelltum okkur í nudd líka sem ég myndi reyndar frekar flokka sem hnoð en það var svosem ágætt að láta hnoða sig eftir flugið og sjóða sig síðan í pottunum. Mér leið líka dáldið eins og soðbrauði á eftir.

Baðhúsin eru mörg hver afskaplega hversdagsleg eins og myndin sýnir glöggt (líkt og margar aðrar gullslegnar byggingar í borginni) en þeir eru reyndar ekkert voðalega mikið fyrir skipulag þarna í baðhúsunum eða í Búdapest almennt, ótrúlega flókið að finna handklæðaleiguna, hvar maður kaupir nuddið, hvar maður fer í nuddið o.s.fv. svo þarf maður að muna eftir miðanum til að fá skilagjaldið fyrir handklæðið.

Baðhúsið sjálft var eins og völundarhús en við komumst þó klakklaust út, rjóðar og sællegar í kinnum og hittum Ástu sem hafði farið í dýragarðinn að skoða pöddur á meðan. Ég var nú dáldið öfundsjúk þegar ég frétti af öllum risaköngulónum sem hún sá þar... Hitti reyndar nokkrar spennandi pöddur í Rúmeníu en meira um þær seinna...
 
Við tókum svo metróinn heim (fórum inn á næstu stöð við Mexíkói Út sem er endastöðin - Get svo svarið það að það var skrifað nákvæmlega svona) Um kvöldið hittum við svo Þórunni og Auróru landverjur sem höfðu bæst í borgina og borðuðum með þeim á veitingastað með appelsínugulum stólum. Linda valdi hann. Maturinn var algjört aukaatriði en stólarnir voru unaðslega appelsínugulir.

Morguninn eftir tékkuðum við okkur út, skelltum bakpokunum í geymslu og töltum í bæinn. Skoðuðum meðal annars cowparade sem er skrúðganga skrautlegra kúa með skoðanir sem flakka milli landa. www.cowparade.com.

Fórum svo í kvöldsiglingu með mat á Dóná en þá höfðum við verið svo heppnar að fá karlmann í liðið, Hauk hinn hugdjarfa, eina karlkyns landvörðinn sem lagði í það að fara með 8 landverjuskellibrellum til Rúmeníu. Það var fallegt að sigla á Dóná í kvöldljósunum og tunglskininu. Þinghúsið var sérlega eftirminnilegt enda ein dýrasta og íburðarmesta bygging í heimi. Væri hægt að byggja heila stórborg fyrir peninginn. Allavega dýrasta sirkustjald í heimi eins og gædinn orðaði það.

Búdapest er falleg og spennandi borg og þegar ég yfirgaf hana á brautarstöðinni á sunnudagskvöldi til að taka næturlest til Rúmeníu þá hlakkaði ég til að eyða þar 2 dögum í viðbót á heimleiðinni. Nú ef mann svo langar að dvelja þar lengur og kannski búa þar um hríð þá er þessi íbúð á leigu... allt í lagi svosem.

Jæja þá er haustið komið með sinni lægðasúpu og Kríurnar farnar. Bloggið hefur alveg legið niðri í sumar enda nóg að gera annað en að þusa á lyklaborðið. Búið að vera hreint frábært sumar, gott veður, gaman í vinnunni, heilsan góð og búið að innbyrða slatta af grilluðu lambi og rauðvíni. Fór líka í eina frábæra bakpokagöngu með Hamingjuhópnum, frá Skálpanesi við Langjökul, að Hagavatni, Hlöðufelli, Skjaldbreið og niður á Laugarvatn. 77km á 4 dögum takk fyrir kærlega. Bakverkir hvað? Það eina sem angraði mig voru blöðrur á litlu tánum kringum neglurnar... skömmu síðar duttu þær af... neglurnar sko. Vinur minn útskýrði málið fyrir mér... sagði að ég væri augljóslega að breytast í flugu... sáu ekki allir The fly annars? Ég ákvað að ef ég væri að breytast í flugu vildi ég vera almennilega kúl fluga, ekki mykjufluga eða dægurfluga... mig langaði sumsé að vera geitungur (mittið sko). Daginn eftir var ég stungin í fyrsta skipti af einum slíkum í Þórsmörk og ákvað þá að verða góður geitungur. Frekari formbreytingar hafa ekki orðið nema mér sýnist ég frekar vera að færast yfir í hunangsfluguformið og er búin að slá persónulegt met í yfirþungavigt... Það stendur samt allt til bóta þar sem sú gamla er byrjuð að æfa blak aftur eftir 15 ára hlé og puða í ræktinni þess á milli. Stefnan var að reyna að fjarlægjast hunangsfluguformið aðeins fyrir fertugsafmælið (sorrí meina þrítugs) svo ég kæmist í einhvern flottan kjól en ætli það verði ekki bara grímubúningaþema til að redda því....  Takið endilega 27. okt frá, stefnan er að tjútta eitthvað þá í tilefni þess að þá verð ég ennþá 29 í 2 daga...

Nú svo er ýmislegt fleira spennandi á döfinni, ég er að leggja drög að því að klára masterinn á næsta ári í umhverfisfræðinni, ætla að fara heim á Hvanneyri og klára þetta þar... fékk alveg hroðalega innilokunarkennd þegar ég fór í nemendaskrá HÍ um daginn til að ná mér í námsyfirlit.... hrökklaðist út undan biðröðinni.

Úr Piatra Craiului þjóðgarðinum í Rúmeníu

En það sem er að æra mig úr spenningi í augnablikinu er Rúmeníuferðin sem hefst á föstudag og stendur í 2 vikur. Flýg til Budapest fyrst og eyði helginni þar með nokkrum öðrum landverjum og þaðan tökum við lest til Transilvaníufylkis í Rúmeníu þar sem fram fer Evrópuráðstefna landvarða. Eftir ráðstefnu er svo 6 daga príl um Piatra Craiului fjallaþjóðgarðinn þar sem birnir og fjallaljón bíða mín ásamt kastala Dracula greifa himselfs. Hann og varúlfarnir mega nú bara vara sig ef þeir ætla að reyna að bíta mig.... það beit mig mús um daginn á lóðinni hjá mér og 2 dögum seinna lá hún dauð fyrir utan!

Hér er slóð á myndasíðu sem ég er búin að koma mér upp, búin að setja nokkrar myndir þar inn.

...er óðinshani

Þetta reisulega og skrautlega par var að svamla í Grundarfjarðarósnum í dag.

Svo er bara að finna sér sætan sefbrúsk til að hreiðra sig í ;)
Óðinshana-hanar eru miklir herrahanar og sjá um að liggja á og koma ungunum á legg meðan kella fer í spa, eða kannski á stjórnarfund í óðinshanafélaginu?